इस्रायलचा इराणवर हल्ला

बॉम्बस्फोटांनी राजधानी तेहरान हादरली
तेहरान
जगावर सध्या युद्धाचे सावट असतानाच आता इस्रायलने इराणवर हल्ला केला आहे. शनिवारी पहाटे इराणची राजधानी तेहरानच्या लष्करी तळांवर हा बॉम्बहल्ला करण्यात आला आहे. इस्रायली लष्कराने या हल्ल्याला दुजोरा दिला आहे.
इराणने केलेल्या हल्ल्यानंतर आता इस्रायलने इराणच्या लष्करी तळांना लक्ष्य केले आहे. या हल्ल्याची माहिती इराणी मीडियानेही दिली आहे. तेहरानजवळील अनेक लष्करी ठिकाणांना लक्ष्य करण्यात आल्याचे माध्यमांनी म्हटले आहे.
इस्रायली लष्कराने या हल्ल्यांची माहिती देताना सोशल मीडियावर म्हटले आहे की, ‘इराणने इस्रायलवर अनेक महिन्यांपासून सातत्याने केलेल्या हल्ल्यांचे प्रत्युत्तर म्हणून ही कारवाई करण्यात आली आहे. इस्रायली संरक्षण दल इराणमधील लष्करी छावण्यांवर अचूक हल्ले करत आहेत. इराण 7 ऑक्टोबरपासून इस्रायलवर हल्ले करत आहेत, त्यामुळे ही कारवाई करण्यात आली आहे.
सोशल मीडिया प्लॅटफॉर्म ‘X’ वर इस्रायली आर्मी आयडीएफने एक फोटोही शेअर केला आहे. यामध्ये इस्रायली आर्मी चीफ ऑफ जनरल स्टाफ हर्झी हालेवी आणि इस्त्रायली हवाई दलाचे कमांडिंग अधिकारी मेजर जनरल टोमर बार हे कॅम्प राबिन (किरिया) येथील इस्रायली हवाई दलाच्या भूमिगत कमांड सेंटरमधून इराणवरील हल्ल्याचे नेतृत्व करताना दिसत आहेत. समोर आलेल्या माहितीनुसार, इराणविरुद्धच्या हल्ल्यांमध्ये शंभरहून अधिक इस्रायलची लष्करी विमाने सहभागी झाली होती, या हल्ल्यानंतर इराण आणि इराकने आपापले हवाई क्षेत्र बंद केले आहे.
लेबनॉनमध्ये हिजबुल्लाह प्रमुख हसन नसरल्लाहच्या मृत्यूनंतर इराणने इस्रायलवर हल्ला केला होता. इराणकडून इस्रायलवर 100 हून अधिक क्षेपणास्त्रे डागण्यात आली होती. मात्र, यातील बहुतेक क्षेपणास्त्रे हवेतच पाडल्याचे इस्रायलने म्हटले होते. या हल्ल्यानंतर इस्रायलचे पंतप्रधान बेंजामिन नेतन्याहू यांनी इराणला या हल्ल्याची किंमत चुकवावी लागेल असे म्हटले होते. तेव्हापासून इस्रायल इराणवर कधीही हल्ला करू शकतो, अशी भीती व्यक्त केली जात होती, आणि आता इस्रायलने हा हल्ला केला आहे.
हिजबुल्लाने लेबनॉनमधून इस्रायलवर हल्ला केल्याचे म्हटले जात आहे. हिजबुल्लाहने सांगितले की, आम्ही आत्मघाती ड्रोन आणि क्षेपणास्त्रांच्या स्क्वॉड्रन्सचा वापर करून उत्तर इस्रायली शहरातील अनेक भागांना लक्ष्य केले आहे. यात रमत डेव्हिड एअर बेस, फिलॉन एअर फोर्स बेस, कर्मिल, अल-मनारा आणि केफर गिलादी ही शहरे यांचा समावेश आहे. याशिवाय शुक्रवारी इस्त्रायलचे 5 मेरकावा रणगाडेही केल्याची माहिती समोर आली आहे.