जम्मू-काश्मीरमध्ये दहशतवादी हल्ला

एका डॉक्टरांसह 7 जण ठार,एका दहशतवाद्याचा खात्मा

श्रीनगर
जम्मू-काश्मीरमधील गांदरबल जिल्ह्यातील गगनगीर भागात रविवारी रात्री मोठा दहशतवादी हल्ला झाला. या हल्ल्यात 7 जणांचा मृत्यू झाला होता. या हल्ल्यानंतर भारतीय लष्कराने शोधमोहिम राबवत एका सशस्त्र दहशतवाद्याचा खात्मा केला.
यावेळी घटनास्थळावरून 1 एके रायफल, 2 वन मॅगझिन, 57 एके राऊंड, पिस्तूल, 3 पिस्तुल मॅगझिन आणि इतर वस्तू जप्त करण्यात आल्या आहेत. एका दहशतवाद्याला ठार केल्यानंतर आता भारतीय लष्कर आणि जम्मू-काश्मीर पोलीस इतर दहशतवाद्यांचा शोध घेत आहेत.
रविवारी रात्री दहशतवाद्यांनी परराज्यांतील लोकांना लक्ष्य करून त्यांच्यावर हल्ला केला. या हल्ल्यात एका डॉक्टरासह 7 जणांचा मृत्यू झाला होता. शाहनवाज अहमद असे डॉक्टरचे नाव आहे. दहशतवादी हल्ल्यात मृत्युमुखी पडलेल्यांपैकी बहुतांश इतर राज्यातील मजूर आहेत. गेल्या काही काळापासून हे सर्वजण कामानिमित्त काश्मिरमध्ये वास्तव्यास होते.
या दहशतवादी हल्ल्यात काही कामगार जखमी झाल्याची माहितीही समोर आली आहे. त्यांना श्रीनगर मेडिकल कॉलेजमध्ये उपचारासाठी दाखल करण्यात आले आहे. हे सर्व मजूर केंद्र सरकारच्या झेड मोड बोगद्याच्या बांधकामात काम करत होते. हा बोगदा मध्य काश्मीरमधील गंदरबल जिल्ह्यातील गगनगीर खोऱ्याला सोनमर्गशी जोडणार आहे.
मजूरांवर हल्ला केल्यानंतर दहशतवादी तेथून पळून गेले. मात्र दहशतवाद्यांच्या गोळीबारात दोन वाहनेही जळून खाक झाली. दहशतवादी हल्ल्यानंतर सुरक्षा दलांनी संपूर्ण परिसराला वेढा घातला आहे. एक दहशतवादी मारला गेला असून इतर हल्लेखोरांना लवकरात लवकर पकडता यावे यासाठी परिसरात शोध मोहीम राबवली जात आहे.
या दहशतवादी हल्ल्यानंतर काश्मीरचे आयजी व्हीके बिर्डी घटनास्थळी पोहोचले. हॉस्पिटलमध्ये त्यांनी जखमींची विचारपूस केली. याआधी 16 ऑक्टोबरला शोपियांमध्ये दहशतवाद्यांनी एका परराज्यातील तरुणाची गोळ्या झाडून हत्या केली होती. ज्या भागात दहशतवादी हल्ला झाला तो मुख्यमंत्री ओमर अब्दुल्ला यांच्या गांदरबल विधानसभा मतदारसंघात येतो. या हल्ल्यानंतर मुख्यमंत्री ओमर अब्दुल्ला यांनी सोशल मीडिया प्लॅटफॉर्म X वर पोस्ट करून या दहशतवादी हल्ल्याचा निषेध केला आहे. तसेच लेफ्टनंट गव्हर्नर मनोज सिन्हा यांनीही या हल्ल्याचा तीव्र निषेध केला आहे