इंग्रजीपेक्षा मराठी अवघड

दहावीच्या परीक्षेत मराठीत 38 हजार विद्यार्थी नापास

मुंबई
महाराष्ट्र राज्य माध्यमिक व उच्च माध्यमिक शिक्षण मंडळाने घेतलेल्या दहावीच्या परीक्षेचा निकाल जाहीर झाला. महाराष्ट्रातील विद्यार्थ्यांना आपली मातृभाषा इतर विषयांपेक्षा अवघड जात असल्याचे चित्र आहे. कारण मराठी विषयात इंग्रजी पेक्षा जास्त विद्यार्थी नापास झाल्याची माहिती समोर आली आहे.
महाराष्ट्र राज्य माध्यमिक व उच्च माध्यमिक शिक्षण मंडळाने घेतलेल्या दहावीच्या परीक्षेत महाराष्ट्राची मातृभाषा असलेल्या मराठी विषयात 38 हजार 437 विद्यार्थी नापास झाले आहेत. विशेष म्हणजे इंग्रजी भाषेपेक्षा मराठीत नापास होणार्‍या विद्यार्थ्यांची संख्या सहा पटीने जास्त आहे. कारण राज्यातील केवळ 6 हजार 738 विद्यार्थी इंग्रजीत नापास झाले आहेत. त्यामुळे राज्यातील विद्यार्थ्यांना मराठी भाषा अवघड जात असल्याचे चित्र आहे.
दरम्यान, राज्यात मराठी भाषेत नापास झालेल्यांची संख्या लक्षात घेता मातृभाषा विद्यार्थ्यांसाठी डोकेदुखी ठरत असल्याचे दिसत आहे. मात्र नापास झालेल्या विद्यार्थ्यांमध्ये परप्रांतीय विद्यार्थांची संख्या जास्त असण्याची शक्यता आहे. दहावीच्या परीक्षेतील मराठीच्या निकालावरून अनेक मराठी भाषाप्रेमींना चिंता व्यक्त केली आहे
महाराष्ट्रात एकूण 10 लाख 94 हजार 152 विद्यार्थ्यांनी मराठी या विषयाची परीक्षा दिली होती. त्यापैकी 10 लाख 55 हजार 715 विद्यार्थी उत्तीर्ण झाले. म्हणजेच 38 हजार 437 विद्यार्थी नापास झाले.दहावीच्या परीक्षेत मुंबई विभागात मराठीत नापास होणार्‍या विद्यार्थ्यांची संख्या सर्वाधिक आहे. मुंबई विभागात एकूण 4 हजार 670 विद्यार्थी मराठीत नापास झाले आहेत. मुंबई विभागात 1 लाख 5 हजार 322 विद्यार्थ्यांनी मराठीची परीक्षा दिली होती, त्यापैकी 1 लाख 652 विद्यार्थी पास झाले आहेत, म्हणजेच 4 हजार 670 इतके विद्यार्थी नापास झाले आहेत.
यंदा दहावीची परीक्षा ही 58 विषयांसाठी घेण्यात आली होती. त्यातील 21 विषयांचा निकाल हा 100 टक्के लागला आहे. यामध्ये गुजराती, उर्दू, फ्रेंच, कन्नड, तामिळ, मल्याळम, बंगाली या विषयांचा निकाल 100 टक्के लागला आहे. तर इंग्रजी विषयाचा निकाल 98.12 टक्के इतका लागला आहे.