सुनेत्रा पवारांना क्लीन चिट
शिखर बँक घोटाळा प्रकरणात संबंध नाही
मुंबई
शिखर बँक घोटाळा प्रकरणी उपमुख्यमंत्री अजित पवार यांच्या पाठोपाठ त्यांच्या पत्नी आणि बारामती लोकसभेच्या महायुतीच्या उमेदवार सुनेत्रा पवार यांना क्लीन चिट मिळाली आहे.मुंबई पोलिसांच्या आर्थिक गुन्हे शाखेने ही क्लीन चिट दिली आहे. त्यामुळे सुनेत्रा पवारांना मोठा दिलासा मिळाला आहे.
सुनेत्रा पवार यांना क्लीन चिट देताना मुंबई पोलिसांच्या आर्थिक गुन्हे शाखेने सागितले की, सुनेत्रा पवार यांनी जय अॅग्रोटेकच्या संचालक म्हणजेच 2010 रोजी राजीनामा दिला. त्यामुळे या प्रकरणाशी सुनेत्रा पवार यांचा काहीही संबंध नसल्याचं सांगण्यात आलं आहे, तसेच याबाबत कोणतेही पुरावे सापडले नाहीत त्यामुळे आता त्यांना क्लीन चिट मिळाली आहे.
शिखर बँकेच्या कामकाजाची नाबार्डने 2007 ते 2011 या काळात तपासणी करण्यात आली होती. यात अनियमितता आढळली होती. त्यामुळे या बँकेची चोकशी करण्यात आली होती. यात बँकेचे कोट्यवधी रुपयांचे नुकसान झाल्याचे निष्पन्न झाले होते. तसेच 25 हजार कोटी रुपयांचा घोटाळा झाला असल्याचे समोर आले होते. मात्र, पोलिस तपासात या बाबत कोणतेही पुरावे आढळले नव्हते त्यामुळे बँकेचे नुकसान झाले नसल्याचा रिपोर्ट पोलिसांनी कोर्टात सादर केला होता. तसेच बँकेने आतापर्यंत 1 हजार 343 कोटी 41 लाख वसूल केल्याचेही पोलीसांनी आपल्या रिपोर्टमध्ये म्हटले आहे.
शिखर बँकेने नियमांच पालन न करता साखर कारखान्यांना कोट्यावधी रुपयांचे कर्ज दिले होते. मात्र हे कारखाने कारखाने तोट्यात गेले आणि NPA झाल्याने ते कमी किंमतीत बँकेच्या संचालकांच्या निकटवर्तीयांना विकल्याचा आरोप झाला होता. यामुळे पवास कुटुंब अडचणीत आले होते. सक्तवसुली संचलनालयाने अजित पवार यांच्यावर जरंडेश्वर कारखान्यासंदर्भात मनी लॉड्रींगचा ठपका ठेवत तपास सुरु केला होता. मात्र काही दिवसांपूर्वी अजित पवारांना क्लीन चिट मिळाली होती.
या नेत्यांनाही मिळाली क्लीन चिट
शिखर बॅक घोटाळा प्रकरणात केवळ सुनेत्रा पवार नव्हे तर राष्ट्रवादीच्या शरद पवार गटाचे आमदार रोहित पवार आणि आमदार प्राजक्त तनपुरे यांना देखील यामुळे दिलासा मिळाला आहे. या दोघांनाही क्लीन चिट मिळाली आहे. याप्रकरणी एकूण 70 जणांवर गुन्हा दाखल करण्यात आला होता. यातील बहुतांशी लोकांना दिलासा मिळाला आहे. दिलासा मिळालेल्यांमध्ये बहुतांशी लोक हे राजकारणाशी जोडलेले असल्याची माहितीही समोर आली आहे.
