तामिनाडूमध्ये विजयचा करिष्मा

सत्ताधारी ‘द्रविड मुन्नेत्र कझगम’ला जोरदार धक्का

चेन्नई
तामिळनाडूमध्ये मतमोजणी सुरू असून अभिनेता सी. जोसेफ विजय म्हणजेच थळपति विजय यांच्या ‘तामिळगा वेट्री कझगम’ (TVK) या पक्षाने राज्यातील एकूण २३४ मतदारसंघांपैकी ११० मतदारसंघांमध्ये आघाडी घेतली आहे. भारतीय निवडणूक आयोगाच्या (ECI) माहितीनुसार, AIADMK+ आघाडी ७५ जागांवर, तर DMK-प्रणीत आघाडी ४७ जागांवर आघाडीवर आहे.
२३४ जागांच्या विधानसभेसाठीचे मतदान २३ एप्रिल रोजी एकाच टप्प्यात पार पडले होते. या निवडणुकीत एकूण ८५.१% मतदारांनी आपला मतदानाचा हक्क बजावला, ज्यामध्ये ४.८ कोटी मतांची नोंद झाली.राज्यातील सर्व ७५,०६४ मतदान केंद्रांवरील मतांची (टपाल मतांसह) मोजणी, राज्यभरातील ६२ निश्चित मोजणी केंद्रांवर केली जात आहे. मतमोजणी केंद्रे आणि सभागृहांमध्ये प्रवेशास परवानगी असलेल्या सर्व अधिकारी व निरीक्षकांसाठी, सुमारे १.२५ लाख सुरक्षा कर्मचारी तैनात करण्यात आलेआहेत
राज्यात सत्ताधारी ‘द्रविड मुन्नेत्र कझगम’ (DMK), त्यांचा प्रमुख प्रतिस्पर्धी ‘ऑल इंडिया अण्णा द्रविड मुन्नेत्र कझगम’ (AIADMK) आणि राजकारणात नव्यानेच प्रवेश केलेला ‘तामिळगा वेट्री कझगम’ (TVK) या तीन पक्षांमध्ये अत्यंत चुरशीची लढत पाहायला मिळत आहे. विविध ‘एक्झिट पोल्स’मध्ये (मतदानोत्तर चाचण्यांमध्ये) बहुतांश संस्थांनी DMK+ आघाडीलाच झुकते माप दिले होते. विशेष म्हणजे, ‘Axis My India’ या संस्थेने TVK ला तब्बल ९८ ते १२० जागा मिळतील असा अंदाज वर्तवला होता; या तुलनेत त्यांनी DMK+ ला ९२ ते ११० जागा आणि AIADMK+ ला २२ ते ३२ जागा मिळतील असे भाकीत केले होते.