ईपीएस ९५ची पेन्शन वाढणार?

वाढीव पेन्शनच्या मागणीवर विचार करण्याचे सरकारचे आश्वासन

नवी दिल्ली :
ईपीएस ९५ नॅशनल मूव्हमेंट कमिटी गेल्या काही महिन्यांपासून निवृत्ती वेतनधारकांच्या पेन्शनची रक्कम वाढवण्याची मागणी करत असून याबाबत संघटनेने नुकतेच आंदोलन केल्याचेही समोर आले होते तर, आता ईपीएस ९५ नॅशनल मूव्हमेंट कमिटी या पेन्शनधारकांच्या संघटनेने सांगितले की, सरकारने वाढीव पेन्शनच्या मागणीवर विचार करण्याचे आश्वासन दिले आहे. ईपीएस-95 योजनेचा देशभरातील सुमारे ७८ लाख पेन्शनधारकांना लाभ मिळत असून हे पेन्शनधारक किमान मासिक पेन्शन ७,५०० रुपये करण्याची मागणी करत आहेत.
पेन्शनर संघटनेने सांगितले की, केंद्रीय कामगार आणि रोजगार मंत्री मनसुख मांडविया यांनी त्यांच्या प्रतिनिधींची भेट घेतली. संस्थेने सांगितले की, यावेळी कामगार मंत्र्यांनी सरकार त्यांची मागणी पूर्ण करण्यासाठी आवश्यक पावले उचलण्याचे आश्वासन दिले.
पेन्शनधारक संघटनेने एका निवेदनात म्हटले की, नुकतेच राष्ट्रीय राजधानी दिल्लीत ईपीएस-95 NAC च्या सदस्यांनी आयोजित केलेल्या निषेधानंतर बैठक पार पडली. देशातील विविध ठिकाणांहून आलेल्या सदस्यांनी सरकारचा निषेध केला आणि केवळ १,४५० रुपये मासिक पेन्शनऐवजी वाढीव पेन्शनची मागणी केली.
त्याचवेळी, सुमारे ३६ लाख पेन्शनधारकांना दरमहा एक हजार रुपयांपेक्षा कमी पेन्शन मिळत असल्याचे संस्थेने म्हटले असून समितीचे अध्यक्ष अशोक राऊत म्हणाले, ‘कामगार मंत्री मनसुख मांडविया यांनी सरकार आमच्या समस्यांवर तोडगा काढण्यासाठी गंभीर असल्याची हमी दिली. आमच्या समस्यांवर तोडगा काढण्यासाठी पंतप्रधानही कटिबद्ध असल्याचे त्यांनी सांगितले. नियमित पेन्शन फंडात दीर्घकालीन योगदान देऊनही पेन्शनधारकांना फारच कमी पेन्शनची रक्कम मिळते.
सध्याच्या पेन्शन रकमेमुळे वृद्ध जोडप्याचे जगणे कठीण असून त्यांनी म्हटले की ईपीएस-95 NAC ने किमान पेन्शन दरमहा ७,५०० रुपये करण्याची मागणी केली, ज्यामध्ये निवृत्ती वेतनधारकांच्या जोडीदारासाठी महागाई भत्ता (डीए) आणि मोफत आरोग्य सुविधांचा समावेश करण्याची मागणी केली. याशिवाय काँग्रेस आणि इतर विरोधी पक्षांच्या अनेक खासदारांनीही संघटनेच्या सदस्यांची भेट घेतली आणि पूर्वीपेक्षा जास्त पेन्शनची मागणी पूर्ण करण्यासाठी पाठिंबा देण्याचे आश्वासन दिल्याची माहितीही राऊत यांनी दिली.