मुसळधार पावसाचा कोकण रेल्वेला फटका

13 तासांपासून वाहतूक ठप्प, आठ एक्स्प्रेस रद्द

रत्नागिरी
गेल्या दोन-तीन दिवसांपासून राज्यात अनेक ठिकाणी मुसळधार पावसाची हजेरी लागत आहे. कोकणात पावसाचा चांगलाच जोर वाढला आहे. या ठिकाणी होत असलेल्या मुसळधार पावसामुळे रविवारी खेडानजीक दरड कोसळली.यामुळे या मार्गावरील रेल्वेची वाहतूक विस्कळीत झाली आहे. रविवारी कोकण रेल्वेची वाहतूक ठप्प झाली होती. कोकण रेल्वेमार्गावर अनेक ठिकाणी एक्स्प्रेस ट्रेन्स जागच्या जागी उभ्या आहेत. यापैकी कोचीवेल्ली एक्स्प्रेस ट्रेन गेल्या 13 तासांपासून चिपळूण रेल्वे स्थानकात उभी आहे. यासह इतर गाड्या देखील जागच्या जागी उभ्या असल्याने प्रवाशांचे हाल होत आहे. तर 8 एक्स्प्रेस गाड्या रद्द करण्यात आल्या आहे.
कोचीवेल्ली एक्स्प्रेस ट्रेन गेल्या 13 तासांपासून चिपळूण रेल्वे स्थानकात उभी आहे. आधी कोकण रेल्वेकडून ही गाडी चार तास उशीरा आहे, असे सांगण्यात आले. त्यानंतर रात्रभर रेल्वे प्रशासनाकडून कोणतीही माहिती देण्यात आली नाही. त्यामुळे प्रवासी गाडीत अडकून पडले. दरम्यान, प्रवाशांना मुंबईला जाण्यासाठी सकाळपासून एसटी बसेसची व्यवस्था करण्यात आल्याचे रेल्वेकडून सांगण्यात आले आहे. मात्र, एक्स्प्रेस ट्रेनमध्ये असणारी प्रवाशांची संख्या लक्षात घेता बससेवा अपुरी ठरत आहे. दरम्यान, कोचीवेल्ली एक्सप्रेस रात्रीपासून अडकून पडल्याने प्रवाशांचे खाण्यापिण्याचे प्रचंड हाल होत आहे. याशिवाय, ट्रेनमधील शौचालयात पाणी नसल्याने प्रवाशांची गैरसोय झाल्याने प्रवाशी कोकण रेल्वेच्या कारभारावर संताप्त प्रतिक्रिया देत आहेत.
खेड आणि विन्हेरे दिवाणखाटी या स्थानकांदरम्यान दरड कोसळली आहे. यामुळे कोकण रेल्वेची वाहतूक ठप्प झाली होती. वाहतूक सुरळीत करण्यासाठी रेल्वेतर्फे युद्धपातळीवर काम सुरु आहे. कोकण रेल्वेची वाहतूक ठप्प झाल्याने एक्स्प्रेस ट्रेन्स आहे तिथेच उभ्या आहे. त्यांना मागे किंवा पुढे जाणे शक्य नाही. तर श्री गंगानगर एक्सप्रेस कामथे स्थानकात, मांडवी एक्सप्रेस खेड स्थानकात, तेजस आणि जनशताब्दी एक्सप्रेस रत्नागिरीत, सावंतवाडी दिवा दिवाणखवटी स्थानकात थांबून आहे.
दरम्यान कोकण रेल्वे मार्गावरील 8 रेल्वे रद्द करण्यात आल्या आहे. यात रेल्वे गाडी क्रमांक 20111 मुंबई सीएसएमटी मडगाव कोकण कन्या एक्स्प्रेस, रेल्वे गाडी क्रमांक 11003 मुंबई सीएसएमटी मडगाव तुतारी एक्स्प्रेस, गाडी क्रमांक 50104 रात्नागिरी दिवा पॅसेंजर, गाडी क्रमांक 12051 सीएसएमटी मडगाव जनशताब्दी एक्स्प्रेस, गाडी क्रमांक 10105 दिवा सावंतवाडी रोड एक्स्प्रेस, गाडी क्रमांक 50107 सावंतवाडी रोड मडगाव एक्स्प्रेस आदी एक्स्प्रेस गाड्या रद्द करण्यात आल्या आहे.