पंतप्रधान मोदींचा श्रीनगरमध्ये योगाभ्यास

योगाचा हा प्रवास अखंडपणे सुरू असल्याचे प्रतिपादन
श्रीनगर
देशासह जगभरात आज 10 वा आंतरराष्ट्रीय योग दिवस साजरा केला जात आहे.आंतरराष्ट्रीय योग दिनानिमित्त पंतप्रधान नरेंद्र मोदी श्रीनगरमध्ये उपस्थित आहेत. दल सरोवराच्या काठावर हॉलमध्ये त्यांनी 7000 हून अधिक लोकांसोबत योगा केला.योग करण्याआधी पंतप्रधान मोदींनी देशाला संबोधित करताना सांगितले की, योगामुळे आपल्याला शक्ती मिळते. आज योग हा जगभरातील लोकांचा पहिला प्राधान्यक्रम बनला आहे. 2014 मध्ये मी राष्ट्रसंघामध्ये आंतरराष्ट्रीय योग दिनाचा प्रस्ताव ठेवला होता. भारताच्या प्रस्तावाला 177 देशांनी एकमताने पाठिंबा दिला, हा एक विक्रम होता. तेव्हापासून ते सातत्याने नवनवीन रेकॉर्ड बनवत आहे. 2015 मध्ये दिल्लीत 35 हजार लोकांनी एकत्र योग केला, हा देखील एक विश्वविक्रम आहे. ते म्हणाले की, गेल्या वर्षी मला अमेरिकेतील यूएन मुख्यालयात योग दिनाच्या संघटनेचे नेतृत्व करण्याची संधी मिळाली, ज्यामध्ये 130 हून अधिक देशांतील लोक सहभागी झाले होते.
योगाचा हा प्रवास अखंडपणे सुरू असल्याचे पीएम मोदी म्हणाले. मला आनंद आहे की आज देशातील 100 हून अधिक मोठ्या संस्थांना मान्यता मिळाली आहे. परदेशातील 10 मोठ्या संस्थांना भारताकडून मान्यताही मिळाली आहे. मोदी म्हणाले की, आज जगभरात योग करणाऱ्यांची संख्या सातत्याने वाढत आहे. योगाबद्दल आकर्षण आणि योगाची उपयुक्तताही वाढत आहे. सर्वसामान्यांना पटवून दिले जात आहे. पंतप्रधान म्हणाले की, मी जगात जितक्या जागतिक नेत्यांना भेटतो, त्यापैकी क्वचितच कोणी असेल जो योगाबद्दल बोलत नाही.