लिफ्ट खाली येण्याऐवजी गेली वर

वेगामुळे २५ व्या मजल्याचं छत तोडलं

नवी दिल्ली
गगनचुंबी इमारतींमध्ये लिफ्ट दुर्घटना वाढू लागल्या आहेत. नोएडामध्ये सेक्टर १३७ मधील पारस टिएरा सोसायटीत टॉवर ५ मधील लिफ्ट चौथ्या मजल्यावर नादुरुस्त झाली. लिफ्टमध्ये असलेले रहिवासी बाहेर पडण्याच्या तयारीत असताना लिफ्टचे ब्रेक फेल झाले. ब्रेक फेल झालेली लिफ्ट वेगाने थेट २५ व्या मजल्यावर पोहोचली.लिफ्टनं टॉप फ्लोअरचे छत तोडलं. या दुर्घटनेत लिफ्टमधील तीन जण जखमी झाले.
टॉवर-५ ची लिफ्ट चौथ्या मजल्यावर बंद पडली. त्यामुळे आत अडकलेल्या रहिवाशांनी बाहेर पडण्याचा प्रयत्न केला.पण लिफ्टचे ब्रेक फेल झाले आणि ती अतिशय वेगात वर जाऊ लागली. लिफ्ट २५ व्या मजल्यावर पोहोचली. लिफ्टनं वरच्या मजल्यावरील छत तोडलं.दुर्घटनेत लिफ्टचं प्रचंड नुकसान झालं. अनियंत्रित लिफ्ट टॉवरचं छत तोडून वर गेली. लिफ्टमधील तीन जण जखमी झाले. त्यात दोन महिला आणि एका पुरुषाचा समावेश आहे. जखमींना तातडीनं जवळच्या रुग्णालयात दाखल करण्यात आलं. घटनेची माहिती मिळताच सोसायटीतील सगळे रहिवासी जमले. टॉवरमधील दोन्ही लिफ्ट बंद करण्यात आल्या. यानंतर रहिवाशांनी जिन्याचा वापर सुरु केला.दुर्घटनेची माहिती मिळताच नोएडा पोलीस सोसायटीत पोहोचले. घटनेचा तपास सुरु असल्याचं पोलिसांनी सांगितलं.