समीर वानखेडे राजकारणात येणार?

शिवसेनेच्या तिकीटावर निवडणूक लढणार?
मुंबई
महाराष्ट्र विधानसभा निवडणुकीच्या पार्श्वभूमीवर एका अधिकाऱ्याच नाव चर्चेत आहे. डॅशिंग अधिकारी समीर वानखेडे महाराष्ट्र विधानसभेची निवडणूक लढवू शकतात. तीन वर्षांपूर्वी समीर वानखेडे यांनी बॉलिवूडचा सुपरस्टार शाहरुख खानचा मुलगा आर्यन खानला ड्रग्ज प्रकरणात अटक केली होती. त्यावेळी राज्यात महाविकास आघाडीच सरकार होतं. समीर वानखेडे यांच्यावर त्यावेळी अनेक आरोप सुद्धा झाले होते. समीर वानखेडे मुंबईच्या धारावी विधानसभा मतदारसंघातून निवडणूक लढवू शकतात. एकनाथ शिंदे यांच्या शिवसेनेकडून ते निवडणूक रिंगणात उतरु शकतात. या संदर्भात त्यांची एकनाथ शिंदे यांच्या शिवसेनेसोबत बोलणी फायनल झाल्याची माहिती आहे. सूत्रांच्या माहितीनुसार, हाय प्रोफाइल अधिकारी समीर वानखेडे लवकरच एकनाथ शिंदे यांच्या शिवसेनेत प्रवेश करु शकतात.

विधानसभा निवडणूक लढवण्यासाठी समीर वानखेडे यांना नोकरीचा राजीनामा द्यावा लागेल. काही महिन्यांपूर्वी ते राजकारणात उतरणार अशी चर्चा होती. राजीनामा दिल्यानंतर ते शिवसेना शिंदे गटात सहभागी होतील, धारावी हा मुंबई काँग्रेस अध्यक्ष वर्षा गायकवाड यांचा परंपरागत मतदारसंघ आहे. त्या धारावीमधून आमदार होत्या. पण 2024 ला खासदारकीची निवडणूक जिंकून त्या लोकसभेवर गेल्या. 2019 साली शिवसेनेने धारावीमधून आशिष वसंत मोरे यांना उमेदवारी दिली होती. पण वर्षा गायकवाड यांनी शिवसेना उमेदवाराचा दारुण पराभव केलेला. आता महायुती या मतदारसंघाला हॉट सीट बनवण्याच्या विचारात आहे.