अश्लील व्हीडिओचा असाही परिणाम

अल्पवयीन भाऊ बहीण यांच्यात शरीरसंबंध
मुंबई
पनवेल भागात राहणाऱ्या एका १३ वर्षीय अल्पवयीन मुलाने आपल्या १५ वर्षीय बहिणीसोबत शरीरसंबंध ठेवल्याने अल्पवयीन मुलगी ३ महिन्याची गरोदर राहिल्याची धक्कादायक घटना उघडकीस आली आहे. विशेष म्हणजे या घटनेतील दोघा बहिण भावांनी मोबाईल वरील अश्लील व्हीडिओ पाहून हे कृत्य केल्याचे उघडकीस आले आहे. या घटनेतील पीडित मुलीला गर्भपात करण्यासाठी वाशीतील महापालिका रुग्णालयात नेल्यानंतर हा प्रकार उघडकीस आला.
वाशी पोलिसांनी या प्रकरणात पीडित मुलीच्या लहान भावाविरोधात बलात्कारासह पोक्सो कलमाखाली गुन्हा दाखल करून हा गुन्हा पुढील तपासासाठी खान्देश्वर पोलिसांकडे वर्ग केला आहे. या घटनेतील १५ वर्षीय पीडित मुलगी आणि १३ वर्षीय तिचा लहान भाऊ हे आई वडीलासह पनवेल भागात राहण्यास आहेत. तसेच ते सध्या शिक्षण घेत आहेत. पीडित मुलीच्या कुटुंबाची आर्थिक परिस्थिती हालाखीची असल्याने तिचे आई वडील दोघेही कामावर जातात. त्यामुळे दोघे बहीण भाऊ घरात राहतात. काही महिन्यापूर्वी हे दोघे बहीण भाऊ घरामध्ये एकटेच असताना त्यांनी मोबाईलवर संभोगाचे व्हिडीओ बघितले होते.
त्यानंतर त्यांनी आपापसात मिळून तसे कृत्य करण्याचा प्रयत्न केला होता. सुरूवातीला त्यांना तसे कृत्य जमले नाही. मात्र जानेवारी महिन्यामध्ये पीडित मुलीच्या भावाने आपल्या बहिणीसोबत जबरदस्तीने शरीरसंबंध केले होते. त्यामुळे पीडित मुलगी ३ महिन्यांची गरोदर राहिली. हा प्रकार पीडित मुलीच्या आई वडिलांना समजल्यानंतर त्यांनी दोन दिवसापूर्वी पीडित मुलीला गर्भपात करण्यासाठी वाशीतील महापालिकेच्या रुग्णालयात नेले. त्यानंतर तेथील डॉक्टरांनी वाशी पोलीसांना याबाबतची माहिती दिली. पोलिसांनी पीडित मुलीचा जबाब नोंदवून तिच्या लहान भावावर गुन्हा दाखल केला आहे. हा प्रकार पनवेल भागात घडला असल्याने वाशी पोलिसांनी गुन्हा पुढील तपासासाठी खान्देश्वर पोलिसांकडे वर्ग केला आहे.